Napoli u mposht të dielën në mbrëmje nga Sampdoria me rezultatin e thellë 3-0 në transfertë. Një ndeshje për tu harruar nga napolitanët e drejtuar nga Carlo Ancelotti, të cilët në asnjë moment nuk arritën të dilnin në lojën e tyre. Në tre ndeshje Napoli ka pësuar 6 gola dhe ky është një problem, por nëse në dy të parat erdhi përmbysja, përballë Sampdorias erdhi një humbje mjaft e hidhur.
Mbrojtësi shqiptar, Elseid Hysaj, në fund të takimit ka bërë disa deklarata për mikrofonat e Radio Kiss Kiss të Napolit:
“Paraqitja ishte shumë e keqe dhe kemi bërë shumë gabime në pjesën e parë, Samp luajti mirë dhe e filloi ndeshjen me shumë intensitet. Ata shfrytëzuan mjaft mirë pakujdesinë e treguar nga ne dhe ishte faji ynë që nuk arritëm tu impononim lojën tonë.
Të pësosh 6 gola në tre ndeshje janë shumë, është e vërtetë, por nuk është vetëm përgjegjësi e mbrojtjes. Të gjithë në skuadër duhet të tregojmë më shumë vendosmëri dhe të jemi më agresivë. Ne punojmë shumë me Ancelottin dhe në mbrojtje jemi të njëjtë prej tre vitesh, kjo na bën që ta njohim mjaft mirë njëri-tjetrin dhe i njohim lëvizjet.
Ajo që duhet të bëjmë është të kufizojmë sa më shumë gabimet dhe të bllokojmë sa më shumë kundërshtarët. Mendoj se është çështje e vëmendjes dhe duhet të jemi më të qartë në fushë. Është vetëm fillimi dhe ne duhet të përmirësohemi sa më shumë,” është shprehur Hysaj.
