Hysaj pas Sarrit, ku do ta vazhdojë karrierën mbrojtësi kuqezi?

Mbrojtësi shkodran i Napolit, Elseid Hysaj është kthyer në një siguri të madhe për pozicionin e tij tek ekipi i të kaltërve. Që nga momenti që u bashkua nga Empoli, bashkë me trajnerin Maurizio Sarri ai ka qenë një titullar i padiskutueshëm dhe është rritur shumë profesionalisht.Edhe pse në adresën e Hysajt, 24 vjeç, ka patur mjaft oferta, Napoli nuk e ka lëshuar lojtarin, që kishte mbështetjen e Sarrit, ndërkohë që nuk ka munguar edhe interesimi i skuadrës së Bayern Mynih. Ky fund kampionati tek Napoli pritet të sjellë shumë ndryshime, pasi nuk arritën të shpallen kampionë dhe i pari që do largohet duket se do të jetë trajneri Sarri. Duke pasur një lidhje të fortë mes Hysajt dhe trajnerit pritet që kjo lëvizje të ndikojë shumë edhe në të ardhmen e mbrojtësit kuqezi.Agjenti i tij Mario Giuffredi rrëfen skenarin: “E ardhmja e Hysajt varet shumë nga ajo e Sarrit, që e konsideroj trajnerin më të mirë në botë”. Më tej, menaxheri shton: “Nëse Sarri konfirmohet kjo gjë mund të ndodhë edhe me Hysajn edhe pse merkatoja mund të sjellë surpriza në çdo moment, të paparashikuara në bazë të ofertave që do të vijnë. Unë kam ndjesinë që trajneri do të qëndrojë, ndoshta edhe Elseid…”, u shpreh Mario Giuffredi, në një deklaratë për mediat italiane.