Kombëtarja shqiptare e futbollit të dielën do të përballet me Izraelin në transfertë ku fitorja do të jetë detyrim. Kuqezinjtë luajnë sfidën e tretë në Ligën e Kombeve, e cila do të ketë një rëndësi të jashtëzakonshme për vetë pozitat në grup. Nga ana tjetër, një fitore është shumë e rëndësishme dhe e domosdoshme në këtë moment për ekipin. Përpara mediave sot doli Elseid Hysaj, i cili u la pushim në takimin me Jordaninë.
Mbrojtësi Hysaj për mediat theksoi: “Të dielën, të gjithë duhet dhe do të japim maksimumin tonë, të luajmë mirë dhe të gjejmë rrugën e fitores për të vijuar më tej. Besoj shumë se ndaj Izraelit mund t’ia dalim. Dje ishte e vështirë, Jordania u mbyll, por ne treguam karakter. Çështja e golit ishte thjesht dhe vetëm punë centimetrash.
Të njëjtët lojtarë jemi nga skuadra që fitoi në Izrael dhe ndryshime nuk ka shumë, dhe besoj se jemi gati për të luajtur ndeshjen. Në lidhje me skemat mund të them që të gjithë luajmë në kampionate të forta në Europë. Thjesht, na duhen 2-3 ditë që të kuptojmë si të japim më të mirën tonë në fushë. Po mendojmë maksimalisht sfidën e së dielës dhe bashkërisht kemi të gjitha mundësitë t’ia dalim”,– u shpreh Hysaj.
