Bashkëjetesa mes Elseid Hysajt dhe Napolit do të marrë fund me mbylljen e këtij sezoni. Të sigurta për këtë janë shprehur mediat në Itali, të cilat kanë zbuluar se menaxheri i mbrojtësit shkodran i ka njoftuar këtë vendim klubit.
Mario Giufredi është takuar me drejtuesit e Napolit për të kërkuar që “klienti” i tij të lejohet për të hyrë në tratativa me skuadrat e tjera në merkaton e verës.
Ky ishte një fund i pritshëm, sidomos pas dështimit të bisedimeve për rinovimin e kontratës. Po ashtu, që pas uljes në pankinë të Carlo Ancelotti, Hysaj është kthyer në një zgjedhje të dytë. Prej kohësh zërat e merkatos e kanë afruar mbrojtësin kuqezi me Chelsea që drejtohet nga mentori i tij Mauricio Sarri. Ndërkohë, ditët e fundit ka dalë në skenë edhe një interesim nga ana e Interit.
