Elseid Hysaj në dy ndeshje mjaft të rëndësishme të Champions League ndaj Liverpool dhe PSG, e ka parë veten në stol. Një vendim i Carlo Ancelottit që i ka habitur të gjithë, pasi mbrojtësi kuqezi është duke kaluar një moment mjaft të mirë.
Kjo zgjedhje nuk është se kanë kënaqur shumë mbrojtësin e Shqipërisë, i cili është nga ata lojtarë që duan të jenë gjithmonë në fushë. Sidomos nëse luhet himni i Champions League.
Por pavarësisht kësaj shkodrani shihet si jë pasuri nga napolitanët dhe për këtë arsye, agjenti i tij, Mario Giuffredi, po bisedon prej disa ditësh me drejtorin sportiv të axurrëve, Cristiano Giuntoli. Ata janë duke kërkuar një akord sa më shpejt, pasi kontrata e tij skadon në vitin 2021.
Hysaj aktualisht fiton 1.8 milionë euro në sezon, por në kontratën e re që pritet të firmos do të ketë një përmirësim të ndjeshëm. Ai kërkon 3 milionë por mund të mbyllet gjithçka në 2,5 milionë euro. Pra, do t’ia kalonte edhe rrogës së dikurshme të Lorik Canës, që te Lacio fitonte 2 milionë euro në sezon.
Madje, sipas asaj që thuhet në shtypin italian, firma mund të vije edhe në periudhën e dhjetorit. Një tjetër nyje e rëndësishme për t’u zgjidhur ka të bëjë sidomos me klauzolën për prishje kontrate. Për jashtë Italisë ajo mbetet e fiksuar në 50 milionë euro, ndërsa agjenti i shqiptarit kërkon që ta ulë atë, ose ta heqë. Napoli nuk është dakord dhe bisedimet kanë ngecur pikërisht në këtë çështje.
