Presidenti i Federatës Shqiptare të Futbollit, Armand Duka, ka reaguar për ndarjen nga jeta të Presidentit të KF Elbasanit, Arben Laze. Duka shkruan se kjo ndarje e parakohshme është tepër e vështirë, dhe se energjia e Lazes do i mungojë komunitetit të futbollit.
“Pak orë më parë mora lajmin e rëndë se miku im i mirë, Presidenti i Elbasanit që ai e deshi aq shumë, Arben Laze, u nda nga ne.
Është e vështirë dhe tani për mua ta besoj dhe të shkruaj këto fjalë për një njeri të mirë, plot humor dhe optimisëm, që kontribuoi aq shumë për futbollin shqiptar.
Beni ishte një mik i të gjithëve ne, një njeri që nuk hiqte dorë lehtë nga përgjegjësitë dhe sfidat. Energjia e tij do t’i mungojë komunitetit të futbollit.
Në këtë moment të vështirë për familjen e tij, miqtë e tij të shumtë, lutemi që shpirti i tij të prehet në paqe.
Lamtumirë miku im, do më mungosh!”.
Sot u nda nga jeta Arben Laze, presidenti i cili i ktheu Elbasanit titullin kampion pas shumë vitesh. Ai i ishte nënshtruar një ndërhyrje kirurgjikale, por për fat të keq nuk nuk ia doli dot mbanë.
Nën drejtimin e Lazes, klubi i Elbasanit për disa vite u kthye ndër protagonistët kryesorë në futbollin shqiptar, duke fituar titullin e dytë kampion në historinë e verdhebluve pas 22 vitesh pritje, në sezonin 2005-2006.
