Ekipi i Kamzës ka marrë një vendim drastik për trajnerin, Ramadan Ndreu pas disa javësh që nuk merr rezultate të mira duke e shkarkuar. Ndreu është shkarkuar ditën e sotme, një ditë pas humbjes me Kukësin në shtëpi.
Vetë trajneri, e kishte paralajmëruar diçka të tillë dje, ku në intervistën pas ndeshjes tha se e kishte menduar të largohej nga drejtimi i ekipit, por nuk dëshironte ta braktiste anijen, në një periudhë kur ekipi po zhvillonte lojëra të mira, por nuk po i vinin rezultate.
Kamza ishte surpriza e kampionatit shqiptar në dy fazat e para, por tani ka pësuar një rënie të madhe duke rrezikuar edhe rënien nga kategoria. Kjo ishte frika më e madhe e drejtuesve të Kamzës dhe po bëhet realitet, pavarësisht se performaca në fushën e lojës është e një niveli të lartë.
