De Biazi ka mbrojtur Panuçin pas humbjes së Kombëtares ndaj Skocisë me rezultatin 0-4. Ish-tekniku i Kombëtares ka qenë i pranishëm në “Loro Boriçi” për të ndjekur takimin.
“Ishte situatë e vështirë për trajnerin pasi skuadra ishte në inferioritet numerik ndaj një kundërshtari që vraponte shumë. Nuk ishte e lehtë, pasi mungonin edhe disa futbollistë si Roshi, Sadiku dhe Hysaj. Ekipi nuk ishte i plotë dhe hasi në shumë vështirësi. Unë dal në mbrojtje të trajnerit, pasi bëri gjithçka mundi me ata që kishte në dispozicion”, u shpreh De Biazi.
Ai gjithashtu foli edhe për episode të takimit dhe kartonin e kuq të Mavrajt. “Nuk ka shumë për të thënë. Për fat të keq pësuam gol në fillim dhe luajtëm gjithë takimin me 10 futbollistë. Skocia është e fortë dhe ishte në gjendje shumë të mirë fizike. Ishte një takim më i vështirë seç e imagjinoja”, përfundoi De Biazi.
