Reporteri dhe fotografi i Reuters-it Danish Siddiqui u vra sot në Afganistan ndërsa po ndiqte përplasjet midis forcave afgane të sigurisë dhe Talibanëve pranë një kalimi kufitar me Pakistanin. Lajmi u bë me dije nga një komandant afgan.
Siddiqui ishte pjesë e ekipit të Reuters që në vitin 2018 fitoi Çmimin Pulitzer për fotografi me raporte mbi krizën e refugjatëve në Rohingya.
Gazetari ishte ‘ngulitur’ tek forcat afgane që nga fillimi i kësaj jave, thotë faqja e internetit e Reuters-it. “Ne po kërkojmë urgjentisht më shumë informacion, në bashkëpunim me autoritetet e rajonit,” thanë në një deklaratë presidenti i Reuters Michael Friedenberg dhe drejtori Alessandra Galloni, duke theksuar se “Danish ishte një gazetar i shquar, një burrë dhe baba dhe koleg i përkushtuar. Shumë i dashur. Mendimet tona i drejtohen familjes së tij në këtë moment të tmerrshëm”. Siddiqui kishte raportuar në agjencinë e tij këtë mëngjes se ishte plagosur në krah ndërsa ishte duke ndjekur përplasjet./ansa
