Kanë mbaruar javët e suksesit për ekipi e Partizanit, pasi janë mposhtur me rezultatin e lehtë 0-1 në “Selman Stermasi”, nga Flamurtari. Të kuqtë kishin arritur të merrnin tre fitore radhazi dhe kjo përballje ishte direkte për vendin e tretë, të cilin e morën vlonjatët. Duro arrin të mposhtë ish-ekipin e tij me një gol të shënuar nga Hoxhaj, i cili e ka viktimën e preferuar Partizanin.
Ndeshja ka nisur në ritme të ngadalta nga të dyja ekipet, ishte e dukshme që të më shumë ruheshin të mos pësonin sesa të sulmonin. Kjo u vu re në 15’ minutat e para që nuk prodhuan asnjë rast të rrezikshëm. Më pas Partizani duket se zgjohet paksa dhe fillon të godasë nga larg, por pa rezultat. Duhet të vinte minuta e 25’ që të shikonim një rast të vërtetë që u shndërrua në gol nga Hoxhaj. Ai kontrollon mjaft mirë një krosim që vjen nga e djathta, pa u menduar dy herë godet drejt portës dhe mposht Alban Hoxhën. Një gol që sjell qetësi në kampin vlonjate dhe më pas janë të interesuar vetëm për administrimin e rezultatit. Partizani nga ana tjetër tenton të fitojë terren dhe të gjejë golin e barazimit, por nuk tregohen aq agresivë në pjesën e parë duke mos rrezikuar asnjëherë seriozisht portën e mbrojtur nga Nurkovic.
Pjesa e dytë fillo me të njëjtin ritëm, partizani tenton të dalë në sulm, por bllokohet që në mesfushë dhe nuk arrin të krijojë asnjë rast serioz në 20’ minutat e para. Më pas të kuqtë e Iulianos përpiqen të depërtojnë nga krahët dhe i afrohen më shumë portës, por duke mos qenë të rrezikshëm dhe aksionet bllokohen para se të goditet porta. Trashi dhe Progni tentojnë të surprizojnë nga distanca portierin Nurkovic, por pa sukses pasi goditjet e tyre fluturojnë mbi traversë. Pavarësish përpjekjeve që bën Partzani, ndeshja vendoset nga ai gol i Hoxhajt i cili i jep tre pikë Flamurtarit dhe blindon vendin e tretë.
Ndërsa tifogrupi i “Guerrils” nuk është aspak i kënaqur me atë çfarë japin lojtarët në fushën e lojës dhe për këtë arsye kanë ngritur sërish banderola kundër tyre.
PARTIZANI – FLAMURTARI 0-1
Hoxhaj 25′
Partizani: Hoxha, Progni, Malota, Ibrahimi, Kalari, Vila, La Kamera (Bardhi 46′), Batha, Adorjan (Herrera 27′), Trashi, Basrak (Asani 81′)
Trajner: Mark Iuliano
Flamurtari: Nurkoviç, Siljanovski (Jakovljeviç 58′), Bicaj, Pollozhani, Musta, Useini, Sidibe, Hoxhaj (Liçaj 81′), Kamara, Alvesh (Neziraj 70′), Bushiç
Trajner: Shpëtim Duro
Gjyqtar: Kridens Meta
