Kupa e Shqipërisë na risolli në brenda pak ditësh përballjen mes Flamurtarit dhe Partizanit, e cila u kontestua shumë gjatë për atë penallti në minutat e fundit. Edhe sfida çerekfinale prodhoi të njëjtin rezultat si pak ditë më parë në kampionat, ku vlonjatët triumfojnë me rezultatin e ngushtë 1-0. Skuadra e Duros ka bërë një hap mjaft të rëndësishëm në Kupë drejt kualifikimit për në gjysmëfinale edhe pse është edhe një ndeshje kthimi.
Vlonjatët dominuan takimin, teksa portieri Hoxha bëri disa pritje vendimtare, ndërsa nga ana tjetër, të kuqtë kundërsulmuan disa herë, por edhe Nurkoviç ishte në lartësinë e detyrës. Ndeshja u vendos pikërisht nga një gabim i Alban Hoxhës, që pasi zotëroi një top, pa t’i rrëshqiste nga duart në momentin që kërkoi të rinisë lojën dhe nga ky moment përfitoi Danilo Alves, që shënoi me një goditje nga distanca.
Tirana me përforcime të shumta tregoi se është një ekip për në Superiore, ata ishin shumë pranë fitores por festën e prishi Sidrit Guri. Një fitore ndaj Kukësit do të ishte si kualifikim për Tiranën edhe pse me një barazim 1-1 shanset janë të barabarta. Bardheblutë e Ze Maria gjetën golin e avantazhit që në pjesën e parë dhe e përballuan Kukësin kampion të Pacult si të barabartë, por goli i Gurit në minutat e fundit bëri që llogaritë të mbeten të hapura për sfidën e radhës në “Zeqrir Ymeri”.
