Kanë nisur sot homazhet për nder të nëntetares Zarife Hasanaj që humbi jetën në Letoni gjatë një misioni ushtarak.
Familjarët dhe të afërmit e ushtarakes Hasanaj janë ndarë me lot në sy me të. Në homazhet në nder të nëntetares janë të pranishëm figura të larta të ushtrisë së Shqipërisë.
Pas kësaj ceremonie trupi i saj do të dërgohet pranë varrezave të dëshmorëve ku do të prehet në monumentin “Nënë Shqipëri”.
Dita e sotme është shpallur Ditë Zie Kombëtare në nder të nëntetares. Ministria e Mbrojtjes njoftoi se me vendim të Këshillit të Ministrave, dita e premte, datë 10 Maj 2019 shpallet ditë zie kombëtare në nderim të nëntetares Zarife Muharrem Hasanaj, rënë në krye të detyrës gjatë misionit të saj jashtë.
Sipas këtij vendimi, në të gjitha institucionet shtetërore flamujt do të ulen në gjysmë-shtizë dhe në orën 12 do të mbahet një minutë heshtje.
