Holanda është rikthyer tek fitorja dhe e ka bërë në mënyrën më të mirë, duke mposhtur kampionët e botës në fuqi, Francën. 2 me 0 ishte rezultati i kësaj përballje në favor të ‘tulipanëve’ me gola të Wijnaldum dhe Depay. Ky rezultat ka dërguar gjermanët në Ligën B dhe në ndeshjen e ardhshme, që holandezët do ta luajnë pikërisht kundër Gjermanisë më 19 nëntor, holandezët do të kenë mundësinë ta fitojnë Grupin 1 të Ligës A me një fitore ose një barazim.
Kanë qenë vendasit që kanë shkuar të parët afër golit në minutën e 2-të me Georginio Wijnaldum, por gjuajtja e tij është ndalur nga një pritje e shkëlqyer e Hugo Lloris. Franca është kundërpërgjigjur në minutën e 28-të me Pavard, i cili ka kërcënuar portën e holandezëve me një goditje nga distanca që ka përfunduar pak sipër traversës.
Më pas ka qenë përsëri Lloris që ka shpëtuar portën e Francës me një tjetër pritje të mrekullueshme, këtë herë ndaj Babel në minutën e 44-t, por topi i devijuar nga numri një i “Gjelave” ka përfunduar në këmbët e Wijnaldum, i cili e ka dërguar në rrjetë pa asnjë problem.
Edhe pjesa e dytë ka patur të njëjtin skenar, me Lloris që ka shpëtuar portën dy herë në harkun e një minute duke ndalur dy tentativat e Dumfires në të 62-ën dhe të 63-ën. Situatë kjo që është përsëritu nga minuta e 73-të në të 76-ën, me portierin francez që i ka mohuar golin Memphis Depay në tre raste. Ky i fundit ka arritur ta mposhtë në fund numrin një të Tottenham me penallti, të realizuar me stilin “panenka”, duke vulosur fitoren dhe ringjalljen e Holandës.
