Zëvendësministri i Brendshëm, Julian Hodaj prezantoi sot në komisionin e Ligjeve projektligjin “Për përpunimin e informacionit të udhëtimit në Republikën e Shqipërisë”.
Hodaj nënvizoi se “ky ligj është pjesë e planit kombëtar të integrimit europian dhe është nismë e Ministrisë së Brendshme”
“Si çdo projektligj, ai është bashkërenduar dhe konsultuar me të gjitha institucionet e interesuara dhe ministritë e linjës dhe është konsultuar gjithashtu me partnerët ndërkombëtarë dhe specifikisht me BE-në. Është shtruar për konsultim publik dhe është miratuar nga Këshilli i Ministrave”, tha Hodaj.
Për sa i përket pjesës së përmbajtjes, Hodaj theksoi se “ky ligj i shërben mbrojtjes së sigurisë kombëtare dhe asaj publike”.
“Është një ligj që synon përafrimin e legjislacionit shqiptar me dy direktiva të BE-së, por nuk është një disiplinë komplet e re apo një strukturë komplet e re. Pranë Policisë së Shtetit edhe sot që flasim ekziston Njësia e Informacionit të Pasagjerit që funksionon mbi bazën e ligjit për kontrollin kufitar dhe me një urdhër të Ministrit të Brendshëm dhe një marrëveshje me SHBA, për sa i përket pjesë së financimit”, tha ai.
Ndërkohë, Hodaj bëri të ditur se “ligji i ri sjell disa risi”.
“Ky projektligj vjen si një ligj i ri dhe jo si një shtesë në kontrollin kufitar. Pikërisht për ta shkëputur nga suaza e një ligji sektorial dhe ky ka qenë edhe sugjerimi i partnerëve tanë europianë, për të ndjekur një standardë ndiqet në çdo vend të BE-së”, tha Hodaj.
Duke u ndalur te pikat kryesore të projektligjit, Hodaj veçoi “saktësimin e informacionit që mblidhet, duke shtuar që përveç transportuesve ajrorë të cilët deri më sot japin këtë lloj informacioni, të njëjtin informacion për udhëtarët dhe mallrat duhet ta japin edhe transportuesit detarë dhe ata tokësorë”.]
“Kështu sigurohet një pavarësi më e madhe e strukturë së re që nga njësia e informacionit të pasagjerit do të quhet do të quhet sektori i inteligjencës rutinë dhe saktëson autoritetet kompetente që kanë interes direkt në mirëfunksionimin e kësaj strukture. Përcaktohet në mënyrë të detajuar mënyra se si mblidhet, mbahet, ruhet, përpunohet, shpërndahet dhe asgjësohet ky lloj informacioni dhe qëllimet për të cilat përdoren, që janë ruajtja e sigurisë kombëtare dhe asaj publike për një seri e gjatë veprash penale si dhe në luftën kundër terrorizmit”, shtoi Hodaj.
Një risi tjetër, sipas tij, “është edhe një garanci për qytetarët, duke forcuar rolin që Komisioneri për Mbrojtjen e të Dhënave Personale ka në këtë drejtim, i cili do të bashkëpunojë madje është edhe bashkautor i shumë akteve nënligjore që do të dalin në zbatim të ligjit”.
Ndërkohë, Hodaj sqaroi se për sa i përket pjesës financiare ky projektligj nuk ka nevojë për shtesa, sepse përballohet nga buxheti i Policisë së Shtetit.
