Pas shumë kohësh, arrihet marrëveshja mes Kosovës dhe Malit të Zi për Demarkacionin. Presidenti i Kosovës, Hashim Thaçi dhe presidenti i Malit të Zi, Filip Vujanovic kanë dalë me një deklaratë të përbashkët për ratifikimin e marrëveshjes së Demarkacionit.
Gjatë deklaratës së tij, Thaçi bëri të ditur pikat e nënshkruara, pjesë e marrëveshjes më Malin e Zi dhe që ndërkohë pritet të procedohet në Kuvendin e Kosovës për ratifikim.
Përmes deklaratës, dy presidentët u kanë bërë thirrje deputetëve që ta votojnë marrëveshjen e nënshkruar ndërmjet dy vendeve në gushtin e vitit 2015.
Presidenti Thaçi tha se kjo marrëveshje është dhurata më e mirë e qytetarëve kosovarë në këtë përvjetor të pavarësisë.
“Me ratifikim e demarkacionit, qytetarët mund të lëvizin lirshëm me liberalizim të vizave. Kjo është dhurata më e çmuar për 10-vjetorin e pavarësisë së Kosovës”, tha Thaçi.
Ky i fundit, po ashtu ka informuar kryeministrin Ramush Haradinaj, kryeparlamentarin Kadri Veseli si dhe krerët e LDK-së, të cilëve u ka dorëzuar deklaratën e përbashkët të dy presidentëve.
Edhe kryeministri Ramush Haradinaj ka uruar qytetarët e Kosovës për këtë ankes-marrëveshje për Demarkacionin, teksa shkruan në Facebook:
“Në këtë jubile të Pavarësisë së Kosovës, jam i lumtur që sot u arrit aneks-marrëveshja për ratifikimin, rishikimin dhe korrektimin e demarkacionit me Malin e Zi. Sot u vulos që sektorët në drejtim të Çakorrit dhe Zhlepit do të rishikohen dhe korrektohen. Deklarata e përbashkët e Presidentit të Republikës së Kosovës, Hashim Thaçi dhe Presidentit të Republikës së Malit të Zi, Filip Vujanoviç, në formën e aneks-marrëveshjes si instrument ligjor detyrues ndërkombëtar, i jep epilog një paqartësie dhe ndarjeje të gjatë në shoqërinë tonë. Me këtë po përfundojmë obligimin e fundit për liberalizim të vizave dhe po hapim një kapitull të ri në lirinë e lëvizjes për qytetarët tonë”.
Kjo deklaratë e dy presidentëve erdhi pas vizitës dy ditore të kryeministrit malazez, Dushko Markoviç.
