Historianit Uran Butka i është dhënë sot titulli Doktor “Honoris Kauza” nga Kolegji i Artit dhe Shkencës të Universitetit Vox Dei Amerikan. Ndërkohë, shkencëtari i njohur indian Madu Krishan dhe kreu i Akademisë e Paqes Botërore i dorëzoi Uran Butkës Urdhrin e misionarit të Paqes Shenjtorja Tereza. Shkencëtari indian vlerësoi lart kontributin e ish-politikanit dhe historianit shqiptar Uran Butka si një personalitet i shkencës shqiptare.
Doktor Shefki Hysa dhe shkencëtari indian i dorëzuan titullin “Honoris Kauza” në diplomacinë ndërkombëtare historianit shqiptar nga universiteti Vox Dei dhe Urdhërin e Paqes Nënë Tereza.
“Falënderoj Akademinë Botërore të paqes dhe Universitetin Vox Dei për dhënien e këtij titulli. Është rezultat i një pune çerek shekulli. Në punën time kam pasur mision vetëm fjalën e lirë”, tha Butka.
Historiani Uran Butka është në pak personalitete shqiptare që është nderuar me këtë çmim. Ai është autor i mjaft librave të njohur dhe studimeve si ato për Mid’hat Frashrin, Luftën e Dytë Botërore etj. Butka rrjedh nga një familje e njohur patriotike shqiptare. I biri i Safet Butkës dhe nipi i Sali Butkës, një familje me kontribut të madh në shtetformimin shqiptar. Butka ka shërbyer edhe si deputet i Partisë Demokratike në dy legjislatura nga viti 1992.
