Termi “inflacion” rrjedh nga fjala latine ‘inflare’ që do të thotë “hedhur ose fryrë”, dhe është përdorur për herë të parë në një kuptim monetar për të përshkruar “një rritje të sasisë së parave” në vitin 1838. Ende sot ekonomistët debatojnë mbi përkufizimin e inflacionit, por në përgjithësi bien dakord se ai nënkupton një rritje të vazhdueshme të çmimeve, në një kohë që bie vlera e parave.
Hiperinflacioni që goditi Gjermaninë në vitin 1920, shkaktoi trazira të mëdha sociale. Fuqia blerëse e parasë ra aq shumë sa që monedha gjermane, marka, u bë më e lirë se sa drutë e zjarrit. Hitleri fajësoi hebrenjtë për spiralen e inflacionit, çka i hapi rrugë Holokaustit. Historianët kanë vënë në dukje se lufta dhe inflacioni shkojnë dorë për dore. Çdo luftë në shekullin XX, ka shkaktuar një inflacion të lartë.
Kartëmonedha kombëtare në Zimbabve, dollari zimbabvian, mban aktualisht rekordin botëror për numrin më të madh të prerjes së tij 100 mijë miliardësh (100.000.000.000.000). Hungaria mban rekordin historik për kartëmonedhën me prerjen më të madhe të emetuar ndonjëherë, por ajo nuk kishte të shënuara të gjitha zerot, ndërsa shuma citohej me shkrim.
Gjatë hiperinflacionit të pas Luftës së Dytë Botërore, sërish Hungaria regjistroi rekordin e rritjes më të shpejtë të inflacionit mujor me 41.900 trilionë për qind (41.900.000.000.000.000) për muajin korrik të vitit 1946, çka do të thoshte se çmimet në treg qenë dyfishuar çdo 13 orë e gjysmë. Vendi i parë që përjetoi hiperinflacionin në shekullin XXI është Zimbabve. Në vitin 2008, një copë bukë kushtonte plot 1.6 trilionë dollarë zimbabvianë. Zyrtarët në Zimbabve, bënë përgjegjës për këtë situate dramatike rritjen e çmimit global të ushqimit si dhe sanksionet ndërkombëtare.
Historianët përmendin inflacionin e lartë, si shkaktarin kryesor të rënies së Perandorisë së lashtë Romake. Kombeve të cilat përdorën standardin e arit në formën e kursimeve, gjatë shekullit XIX dhe deri në vitin 1914, u prekën pak ose aspak nga tendencat inflacioniste. Edhe në Shtetet e Bashkuara ndikimi i inflacionit ka qenë i madh. Në vitin 1930, një shtëpi kushtonte mesatarisht 3.845 dollarë. Në vitin 2013, një shtëpi në SHBA kushtoi mesatarisht 289.500 dollarë.
Përshtati për Tirana Today, Alket Goce
