Historia e flakëve në Greqi mbart me vete shumë viktima, të lënduar, me mijëra shtëpi të shkrumbuara, por mister mbetet edhe zhdukja e dy binjakeve. Ndërsa prindërit kanë vënë alarmin për vajzat e tyre, një tjetër çift pretendon se janë fëmijët e tyre. Binjaket e moshës dy-vjeçare, kur ka shpërthyer zjarri, kanë qenë në shoqërinë e gjyshes dhe gjyshit të tyre.
Yiannis Filipopoulos ka kërkuar nëpër spiptale, stacione policore dhe zjarrfikëse për vajzat, e po kështu ka dhënë dhe një apel prekës përmes ekranit të televizioneve greke. Ai tha se në një prej televizioneve kishte parë që vajzat e tij të mitura u shpëtuan nga një anije në Rafinë, dhe më pas u transportuan në tokë. Por më e çuditshme bëhet kjo ngjarje, pasi një tjetër çift ka deklaruar se ato vajza që shfaqen në televizion nga xhirimet e “Alpha”, janë vajzat e tyre dhe janë me ta.
“Nuk e di nëse është nga gjendja jonë e ngarkuar, nga shoku që kemi pësuar, por nuk besoj se jemi aq keq sa të ngatërrojmë dhe të mos njohim vajzat tona.
Ato që shihen në ato pamje janë vajzat e mia. Ndoshta familja tjetër, sepse në video shihen një burrë dhe një grua, bashkë me vajzat e tyre, aty afër kanë pasur edhe të mijat, sepse aty duket që janë më shumë se tre vajza”, është shprehur ai.
“Ne kemi shkuar në çdo spital për të parë nëse mes të lënduarve janë dhe vajzat e mia, por nuk i kemi gjetur. Gjithashtu kemi dhënë edhe kampion të ADN-së për të parë nëse ndonjë nga viktimat janë fëmijët tanë, por për fat të mirë, nuk ka rezultuar asnjë.
Ne shpresojmë dhe jemi të bindur se ato vajza janë binjaket tona, por ndoshta teksa kanë parë gjyshërit të digjen, prindërit e mi janë shokuar dhe nuk munden që të flasin dhe të reagojnë për të na kërkuar”, shprehet ai.
