Ne shqiptarët i kemi mbushur mendjen vetes se jemi njerëz të besës, e madje këtë e kemi një institucionin të hipotekuar në “arkivin” e pasurive tona kombëtare.
Gjithashtu i kemi mbushur mendjen edhe se nderi për ne është gjeja më e shenjtë. Dhe në këtë pikë ne jemi shumë të qartë, që për nder kuptojmë atë seksual, pra mbrojtjen e nderit të femrës.
Por asnjëherë se kam kuptuar se si është e mundur që burrat që të vrasin për nder, mbushën rrugët e Evropës me vajzat e vendit të tyre, madje edhe në farefis, që i shfrytëzojnë për prostituta?
Si shpjegohet që këta soj burrash bëjnë dasma me krushqi e unaza në vendin e tyre, dhe sapo mbërrijnë në Itali e Holandë, nuset i nxjerrin në rrugë për ti shfrytëzuar si prostituta?
Këto realitete kontradiktore, mu kujtuan ndërsa prej dy ditësh ka shpërthyer kudo histeria e atdhedashurisë, për mbrojtjen e figurës së Skënderbeut, pasi Komuniteti Mysliman vendosi një ekran në sheshin “Skënderbe”, kur do të kryhej falja e Bajramit.
Sa i takon ekranit, unë ndaj mendimin se ajo është çështje këndvështrimi. Nga diku shtatorja nuk shikohej plotësisht, e nga diku shikohej. Është si puna e eklipsit, që në një kontinent shikohet i plotë, diku i pjesshëm e diku nuk shikohet fare. Unë mendoj se këto lloj histerish shpërthejnë sa herë preket diku sedra historike dhe atdhetare.
Por a janë vërtet kaq atdhetarë shqiptarët? A iu dhimbset vërtet historia dhe vendi i tyre kaq shumë sa bërtasin nëpër media e rrjetet sociale? Unë them që jo! Ata që bërtasin për një ekran ne sheshin “Skënderbej”, përse nuk bërtitën kur Kalasë së Mamicës në Petrelë i ndërtuan mu në majë një mejhane që pjek qofte dhe pula?
Këta që bërtasin kaq shumë për historinë, përse nuk shqetësohen për shkatërrimin e trashëgimisë, poshtë e lart, nëpër qytete e male? Këta që e duan kaq shumë Shqipërinë, përse nuk e shprehin dashurinë ndryshe, duke bërë më shumë për ta shpëtuar këtë vend nga shkatërrimi dhe rrënimi që po i bëhet çdo ditë në male, fusha, lumenj e dete? Ka shumë mënyra për të treguar se sa shumë e doni këtë vend. Më e gabuara është të fusni përçarje fetare.
