E ardhmja e Gonzalo Higuain vazhdon të mbetet pezull, pasi tek Juventusi ‘nuk e duan’ dhe deri tani nuk ka akoma një ofertë të kënaqshme. “La Gazzetta dello Sport” shkruan se argjentinasi bashkë me të vëllain që është edhe agjenti i tij kanë udhëtuar një natë më parë drejt Milanos me avion privat. Atje janë takuar me Leonardon, drejtorin sportiv të Milanit.
Higuain është i vendosur që të largohet nga Juventusi këtë vit, por janë dy probleme që e pengojnë. E para është shifra e lartë që kërkojnë bardhezinjtë të përfitojnë nga shitja e sulmuesit, plot 60 milionë euro. Kjo pasi vetëm dy vite më parë e blenë 90 milionë euro.
Nga ana tjetër është edhe rroga e lojtarit, i cili kërkon 8 milionë euro në sezon dhe tek Milani të dyja duken të vështira për tu plotësuar. Mësohet se gjatë javës Leonardo dhe agjenti i Higuain së bashku me Juventus do të vijojnë negociatat intensive deri sa të arrijnë në një marrëveshje. Ndërsa sot Higuain u paraqit në testet mjekësore te Juventus dhe do të zhvillojë stërvitjen e parë.
