Trajneri i përfaqësueses së Argjentinës, Sampaoli ka vënë në diskutim përfshirjen e Gonzalo Higuain në listën e lojtarëve që do të udhëtojnë në botërorin Rusi 2018. Tekniku ka zgjedhur që para tij të thërrasë në ekip kapitenin e Interit, Mauro Icardin dhe sulmuesin e Boca Junior, Benedetto. “El Pipita” nuk është ftuar edhe në 4 ndeshjet e fundit eliminatore të Argjentinës për në botërorë dhe Sampaoli është shprehur se ai është lënë jashtë për arsye taktike. Dy sulmuesit e rinj janë më të pozicionuar në zonë dhe mua një sulmues i tillë më duhet, ndërsa Higuain luan më larg dhe tenton të godasë nga jashtë.
Edhe në miqësoren e nëntorit lojtari i Juventusit nuk është përfshirë në listën e lojtarëve që do të përballen me organizatorët e Botërorit, Rusinë. Në konferencën e prezantimit të lojtarëve të ftuar tekniku i Argjentinës, nuk i ka shpëtuar pyetjes nëse do të jetë Higuain në Rusi apo jo. Përgjigjen trajnerit ishte: “Nuk e di nëse ai do të jetë me ne, nuk kam vendosur asgjë akoma. Por do ti shoh të gjithë me vëmendje para se të vendos, se kush na ndihmon më shumë në këtë rrugëtim”. Mesa duket trajneri nuk ka ndryshuar akoma mendim nga zgjedhjet që ka bërë dhe me shumë gjasa Higuain mund të mos jetë në Rusi vitin e ardhshëm.
