Interi ka zyrtarizuar blerjen më të re të janarit, Rafinha, i cili bashkohet në formë huazimi me të drejtë blerje 35 mln euro. Mesfushori brazilian kaloi me sukses vizitat mjekësore me zikaltrir mëngjesin e sotëm, përpara se të nisej drejt zyrave qendrore të klubit gjatë mbrëmjes për të nënshkruar kontratën.
“FC Internazionale Milano dhe FC Barcelona kanë arritur marrëveshjen për huazimin e lojtarit Rafinha deri në 30 qershor të 2018. FC Internazionale Milano ka një opsion për ta blerë përfundimisht lojtarin për 35 mln euro plus 3 mln euro bonuse, që duhet të konfirmohet përpara se të përfundojë sezoni aktual,” shkruhej në komunikatën zyrtare të klubit milanez.
Sapo doli nga zyrat zikaltër, ku nënshkroi edhe kontratën, Rafinha u rrethua nga një grup gazetarësh dhe mbështetësish të Interit, që kërkonin të dëgjonin diçka prej tij.
“Jam vërtet i lumtur, është kënaqësi e madhe që të vij këtu. Vërtet dua që të përballem me këtë fazë të re të karrierës time. Shumë lojtarë të rëndësishëm kaluan te Interi që bënë histori dhe unë dua të bëj më të mirën dhe të bëj gjithçka që është e mundur për të fituar tituj me këto ngjyra. Unë gjithmonë dua që të nxjerrë më të mirën prej kësaj, dua që të fitoj sa më shumë ndeshje që është e mundur dhe të ndihmoj ekipin që të arrijmë synimin tonë, Ligën e Kampionëve”.
“Është gjithmonë mirë që të kesh në grupin e lojtarëve dikë që flet gjuhën tënde, më pas e njoh edhe Icardin pasi kam luajtur me të dhe menjëherë më ndihmoi duke vizituar së bashku qendrën sportive Appiano Gentile. Unë mund të luaj në disa role, si në krahun e djathtë, ashtu edhe në krahun e majtë”, u shpreh lojtari i ri i Interit.
