Ka nisur një hetim disiplinor për ish-prokurorin e Elbasanit, Dritan Gina. Ky i fundit refuzoi të zbatojë urdhrin e kryeprokurores për ndërprerjen e komandimit në Elbasan.
Rasti i Ginës bëri bujë në media në fillim të janarit, teksa kundërshtoi të zbatonte urdhrin e Prokurores së Përgjithshme, Arta Marku, duke e cilësuar atë si të jashtëligjshëm.
Dritan Gina është bashkëshorti i Rovena Gashit, e cila po ashtu u shkarkua nga Marku dhe njihet si njeriu i ish-kryeprokurorit Adriatik Llalla.
Gina e akuzon Kryeprokuroren për shpërdorim detyre, teksa ka depozituar një kallëzim penal prej 15 faqesh tek Krimet e Rënda ndaj Kryeprokurores Arta Marku:
“Është kompetencë e krimeve të rënda për shkak të subjektit. Kam pretenduar një sërë shkeljesh të rënda të normave kushtetuese dhe ligjore, i kam argumentuar në kallëzimin penal prej 15 faqesh. Më vjen keq që përfaqësues të popullit marrin përsipër të flasin në emër të përfaqësues të shtetit që jemi ne prokurorët, kthehen në personazhe të denjë të revistës “Kunji” të Haxhi Isufit. Unë nuk lirova zyrën, unë jam profesionist dhe i nënshtrohem detyrës dhe ligjit.
Unë s’mund të pretendoj të rri në atë prokurori, se puna ka të bëjë me të drejta e detyra, veprime me thesarin e shtetit, organizimin e prokurorisë, etj. Ajo mënyrë që zgjodha dje s’është mënyra që dua të mbaj zyrën e shtetit por mënyra e reagimit të një profesionisti që s’mund të lejojë kërkënd të nëpërkëmbi mua dhe kolegët e mi. U bëj thirrje të mos lejojnë të nëpërkëmben nga shokët e partisë, dinjiteti dhe figura e tyre…”
Shkarkimi i Rovena Gashit
Më 29 dhjetor, kryeprokurorja Arta Marku bëri lëvizjen e parë në institucionin që drejton, teksa shkarkoi nga detyra Rovena Gashin, drejtore e njësisë së dekriminalizimit dhe zyrën e marrëdhënieve me Jashtë në Prokurorinë e Përgjithshme.
Rovena Gashi firmosi së fundmi kërkesën dërguar KQZ-së për heqjen e mandatit të Aqif Rakipit dhe Gledion Rahovicës, pasi nuk kishin deklaruar arrestimet në Itali disa vjet më parë.
Në vend të Gashit, Kryeprokurorja Marku ka emëruar Arqile Koçën, një prej kandidatëve për Prokuror të Përkohshëm të Përgjithshëm.
Rovena Gashi padit Arta Markun
Gashi ka bërë një kallëzim pranë Gjykatës Administrative, ndërsa ka kërkuar rikthimin në detyrë si drejtuese e Njësisë së Dekriminalizimit, pasi sipas saj, shkarkimi i saj është i lidhur me propozimin që ka bërë për ndërprerjen e mandateve të Rehovicës dhe Rakipit.
Ajo kërkon që vendimi të pezullohet dhe vendimi për shkarkimin e saj të shpallet i pavlefshëm.
“Vendimi për lirimin tim është absolutisht i pavlefshëm. Të pezullohet vendimi i lirimit si Drejtore e Marrëdhënieve me Jashtë. Prokurorja e Përgjithshme e Përkohshme ka uzurpuar kompetencat e Këshillit të Larte të Prokurorisë. Lirimi nga detyra është bërë pas kërkesës për ndërprerjen e mandatit për Aqif Rakipin dhe Gledion Rehovices” thuhet në padinë e Gashit drejtuar Gjykatës Administrative.
