Ditën e hënë, kur nisi zyrtarisht gjyqi ndaj ish-kryeministrit Sali Berisha për aferën e privatizimit të ish-kompleksit “Partizani”, ai mungoi në mënyrë të pazakontë. Jo vetëm që nuk u paraqit në seancën e parë në Gjykatën e Posaçme, por shmangu edhe konferencën e përditshme me gazetarët, një rutinë që ai e ka ndjekur me rregull gjatë muajve të fundit.
Përkundër kësaj, kreu i Partisë Demokratike u mjaftua me një status në Facebook, ku akuzoi SPAK për nënshtrim ndaj urdhrave të Edi Ramës, pa dhënë asnjë sqarim konkret për mosparaqitjen në gjykatë apo për mungesën në komunikimin me median.
E njëjta sjellje u përsërit edhe të martën, ku Berisha sërish mungoi në selinë blu, duke lënë bosh podiumin ku zakonisht jep deklarata dhe përgjigjet pyetjeve të gazetarëve.
Kjo tërheqje e papritur ka nxitur spekulime mbi arsyet e saj. Dy skenarë përfliten më së shumti:
Shmangie e pyetjeve për procesin gjyqësor, që tashmë është zyrtarizuar në GJKKO, duke i pamundësuar Berishës vijimin e retorikës për vjedhjen e votave dhe duke e vendosur përballë hallit të tij personal.
Rënia e kauzës së “vjedhjes së zgjedhjeve”, pasi rinumërimet në qarqet Tiranë dhe Fier nuk kanë përforcuar pretendimet e PD-së, përkundrazi – po nxjerrin në pah gabime që nuk përmbysin rezultatin dhe në disa raste i kanë dëmtuar vetë kandidatët e Berishës.
Nëse kjo heshtje zgjat, nuk përjashtohet mundësia që Berisha të marrë një “pushim politik” deri në shtator, për t’u rikthyer me një strategji të re, nëse do të arrijë të rindërtojë besueshmërinë e humbur.
Por deri atëherë, as mediat nuk mund t’i shmanget, dhe as kauza e pretenduar për zgjedhje të manipuluara nuk po qëndron në këmbë, ndërsa procesi gjyqësor pritet të hedhë më shumë dritë mbi një nga akuzat më të rënda ndaj tij në 30 vite karrierë politike.
