I zhgënjyer me buxhetin e Teatrit, Hervin Çuli ka bërë një deklaratë të fortë ku ka thënë publikisht se nuk do të kandidojë më për të qenë në krye të këtij institucioni. Nga skena e Teatrit Skampa në Elbasan, Drejtori i Teatrit Kombëtar, Hervin Çuli, ka pohuar se nuk do të kandidojë më për të qenë në krye të Teatrit. Ai ka shtuar më tej se Ministria e Kulturës ka ulur sërish buxhetin për Teatrin.
Në një lidhje direkte me “ABC LIVE”, ai u shpreh: “Nuk do kandidoj, do kthehem në profesionin tim”.
Teksa po punonte për shfaqjen ” Jashtë bie borë”, Çuli u shpreh se buxheti i Teatrit Kombëtar në vit është aq sa fitoi Ilir Shaqiri i vetëm në “Big Brother VIP”.
“Kemi probleme me buxhetin. Ministria e Kulturës ka ulur prap buxhetin me Teatrin. Nga Mirela Kumbaro është ulur 25%. Nga 150 milion lekë të vjetra, pra janë shumë pak lekë për një Teatër. Ne tashmë jemi në 120 milionë lekë të vjetra buxhet vjetor.
100 mijë euro unë bëj kalendarin e Teatrit Kombëtar. 100 mijë euro sa mori Donaldi, jo Donaldi, si e ka ai? Ilir Shaqiri, vetëm, një djalë i shkëlqyer fitoi në një emision aq sa e ka buxhetin Teatri Kombëtar”, u shpreh Çuli.
