Rusia do të dëbojë diplomatët e Britanisë së shpejti. Kështu ka pohuar ministri i Jashtëm rus, Sergei Lavrov, pas masave të marra nga Britania, e cila dëboi 23 diplomatë rusë.
Britania e Madhe e mori këtë vendim pasi Moska refuzoi të shpjegojë se si u përdorën agjentët nervorë në spiunin rus dhe vajzën e tij në Londër.
Moska mohon të ketë përgjegjësi lidhur me këtë çështje, ndërsa kur ministri Lavrov u pyet se kur do të ndodhte dëbimi, ai tha: “Absolutisht shumë shpejt. Jua premtoj këtë”.
Lavrov tha gjithashtu se qasja e Britanisë së Madhe për çështjen u shkaktua pjesërisht nga problemet e qeverisë mbi Brexit.
Ish-spiuni, Sergei Skripal, 66 vjeç, dhe vajza e tij, Yulia Skripal, 33 vjeçe, mbeten të sëmurë rëndë në spital pasi u gjetën të rrëzuar në një stol në Salisbury, Wiltshire, më 4 mars.
Lënda e përdorur në sulmin është identifikuar si pjesë e një grupi të agjentëve nervorë të zhvilluar nga Rusia, të njohur si Novichok, tha May.
Të mërkurën, Shtëpia e Bardhë tha se mbështeti vendimin e Britanisë për të dëbuar diplomatët rusë.
Zëdhënësja e presidentit Donald Trump akuzoi Rusinë për minimin e sigurisë së vendeve në mbarë botën. TIRANA TODAY
