Ishte programuar që të zhvillohej revanshi mes David Haye dhe Tony Bellew, në 17 dhjetorë, por që tashmë është e pamundur të zhvillohet pas dëmtimit që ka pësuar ish-kampioni i botës Haye. Ai ka pësuar një dëmtim në bicep, që e ka penalizuar të jetë i pranishëm në stadiumin “O2 Arena” në Londër. Haye dhe Bellew u përballën për herë të parë në mars të këtij viti, me Bellew që fitoi me “KO teknik”, pas një dëmtimi që Haye pësoi në “Thembrën e Akilit”, që e detyroi edhe të kryejë një operacionin. Pavarësisht këtij dëmtimi në stërvitje të Haye, palët po punojnë që revanshi të zhvillohet në muajt e parë të 2018-ës, ndërkohë që gjatë kësaj jave priten lajme të reja.
“Jam i mërzitur që më duhet të jap këtë lajm, pasi e prisja me padurim këtë përballje të dytë me Bellew, për t’u hakmarrë. Ne po bisedojmë që kjo përballje të zhvillohet në periudhën nga 24 marsi deri më 5 maj të 2018-ës. Pavarësisht zërave se kam qenë i dëmtuar prej kohësh, ju konfirmoj se kam qenë në formë të shkëlqyer, si asnjëherë më parë këto vitet e fundit. Mezi po pres që të rikthehem në ring, për të rishkruar historinë e sfidës time me Bellew. Pësova një incident gjatë një seance stërvitore, ndonëse kam bërë qindra të tilla më parë. Rrëshqita dhe u dëmtova, duke e bërë të pamundur këtë sfidë më 17 dhjetor. Kam nisur që tani procedurat e duhura për rikuperim dhe sapo të jem rikuperuar 100% do të rikthehem në palestër, duke nisur rehabilitimin e krahut brenda 2-3 javëve. I kërkoj ndjesë Tony dhe stafit të tij, fansave tanë që i lashë të zhgënjyer, por ju premtoj se do ta mbyllim këtë sfidë në muajt e parë të 2018-ës”, tha Haye në një deklaratë për mediat.
Por pas njoftimit të tërheqjes nga dueli, është futur në skenë Tyson Fury, i cli me anë të një postimi në Instagram, ka kërkuar që të ndeshet ai në vendin e Haye, përballe Bellew. Ai është shprehur se do të rikthehet më në formë se kurrë, për të marrë titullin që i takon vetëm atij dhe këtë do ta bëjë duke mposhtur më të mirët. Fury është shprehur se ndoshta për 5 muaj do të jetë gati për të zbritur në ring dhe sfidon hapur Bellew për tu përballur me të.
Fury është shprehur se ka ndjerë të njëjtën gjë disa vite më parë, kur Haye ka anuluar dy herë duelin me të për shkak të dëmtimeve. Ndaj dhe ka hedhur hapin e parë për të zënë vendin e lënë bosh dhe të sfidojë Bellew. “Sapo mësova lajmin e tërheqjes së Haye, që nuk do të duelojë me Tony më 17 dhjetor. Unë jam gati për t’u përballur me Bellew, por jo tani, më 5 maj, në “O2 Arena” të Londrës. Unë dua të përballem me një burrë të vërtetë, me më të mirët e peshave të rënda, t’i mund të gjithë. Unë jam kampioni real i botës. Nëse Bellew pranon, unë kam vetëm 5 muaj për të rënë në peshë, ndaj e sfidoj”, tha Fury.
