Kreu i Lëvizjes Vetëvendosje, Albin Kurti ka thënë se Hashim Thaçi do të shkojë drejt rrugës së kryeministrit maqedonas, Nikolla Gruevski dhe do të kërkojë azil politik, por në Rusi.
“Para dy viteve e gjysmë pak kujt, në mos askujt, nuk ia mori mendja që fiton Trump dhe ndodh Brexit. Por, askujt para një viti e gjysmë nuk ia mori mendja se Gruevski do të kërkoi azil në Hungari, e kësaj rruge drejt azilit politik, por në Rusi, është edhe Hashim Thaçi. Ne nuk mund ta ndalim rrugëtimin e tij, por mund ta ndalim që të mos e marrë me vete edhe Kosovën”.
Këtë deklaratë, Kurti e bëri gjatë një konference për mediat, teksa i bëri thirrje Aleancës për Ardhmërinë e Kosovës (AAK) dhe Nismasocialdemokrate të mos e formojnë ekipin negociator që do t’i shërbente Hashim Thaçit.
“Në protestën e 29 shtatorit populli i Kosovës ka dëshmuar se nuk i nënshtrohet një njeriu”, ka shtuar Kurti.
Ai më tutje ka propozuar alternativat me katër hapa, për bisedime dhe zgjedhje të qëndrueshme me Serbinë:
Shqyrtimi dhe vlerësim i dialogut 6 vjeçar në mes Kosovës dhe Serbisë;
Duhet të dimë çka duam dhe cilat janë qëllimet tona;
Prezantimi i platformës me parime në mes Kosovës dhe Serbisë;
Ekipi negociator me përbërje gjithëpërfshirëse dhe strategji të fuqishme.
