Betimi i Hipokratit kërkon nga mjeku, të bëjë çdo gjë që mundet për të shpëtuar jetën e pacientit. Ironikisht, një nga vrasësit më famëkeq në histori, është mjeku britanik Harold Shipman, të cilin media e pagëzoi me nofkën “Doktor Vdekja”.
Shipman nisi vrasjet që në vitin 1972, kur besohet e vrau të paktën 71 pacientë gjatë periudhës së praktikës. Deri në vitin 1998, ai ishte një mjek shumë popullor në zonën ku punonte. Në marsin e atij viti, një mjeke shprehu dyshime mbi shkallën e lartë të vdekjeve në mesin e pacientëve të tij.
Por policia tha se nuk ishte në gjendje të gjente prova. Kjo pasi trupat e shumë prej viktimave digjeshin në krematorium. Por vdekjet e dyshimta nisën të shtoheshin. Shipman i vriste zakonisht pacientët me një mbidozë morfine. Ai u arrestua pak muaj më vonë, kur vajza e njërës nga viktimat e tij, e akuzoi atë për vrasje.
Pas një hetimi 2-vjeçar, u arrit të faktoheshin 251 vrasje, kryesisht të grave të moshuara. Shipman u dënua me burgim të përjetshëm. Vdiq në vitin 2004, pasi kreu vetëvrasje në qelinë e tij. Ai nuk pranoi asnjëherë asnjë nga vrasjet.
TIRANA TODAY
