Formimi i Ushtrisë së Kosovës nuk do të ketë ndikim në dialogun me Serbinë. Kështu është shprehur kryeministri i Kosovës, Ramush Haradinaj gjatë një ligjërate në Universitetin Amerikan të Kosovës (AUK).
Në fokus të kësaj ligjërate ishte transformimi i FSK-së në ushtri, ndërsa Haradinaj sqaroi edhe procedurat që FSK duhet të kalojë deri në shndërrimin e saj në ushtri.
“Profesionalizmi i FSK-së është dëshmi se do të vazhdojë bashkëpunimin me NATO-n. Periudha kohore që nevojitet për ushtrinë, është proces që do të zhvillohet në koordinim me NATO-n”, ka thënë kryeministri i Kosovës.
Haradinaj ka përsëritur qëndrimin se pa formimin e ushtrisë, Kosova nuk mund të mbrojë integritetin territorial dhe as komunitetet që jetojnë në vend.
