Kryeministri i Kosovës, Ramush Haradinaj ka shprehur sërish pakënaqësi ndaj Bashkimit Evropian. Ai foli për një anim të BE-së nga Serbia, lidhur me çështjen e Kosovës.
Madje, Haradinaj përmendi rastin e fundit ku kryeministrja serbe Ana Bërnabiç i dërgoi letër kryeministrit shqiptar Edi Rama, duke kërkuar që të rishikojnë njohjen e Kosovës shtet të pavarur dhe sovran.
Kryeministri i Kosovës tha se ndihej i ofenduar nga një letër e tillë dhe mosveprimi i Evropës.
“Ne na thuhet mos veproni, ndërsa nuk po disiplinohet Serbia”, deklaroi Haradinaj, duke shtuar se as Federica Mogherini, as Johannes Hahn, as Jean Claude Juncker, as Donald Tusk e as Cecilia Malmstrom nuk janë lajmëruar për t’i thënë Serbisë se ajo letër nuk është në frymën e stabilizimit të Ballkanit.
“Ku është Evropa, ku janë ata që nuk reagojnë ndaj Serbisë. Ka shkuar koha kur ne kemi dëgjuar secilin çka na thotë. E vetmja mënyrë e përmbylljes së paqes Kosovë – Serbi, e vetmja mënyrë është pranimi i të drejtës së Kosovës”, ka thënë kryeministri.
