Raportuesi për Shqipërinë në Parlamentin Europian, Knut Fleckenstein përforcon dhe një herë mesazhin që dha në Shqipëri gjatë vizitës së tij të pak ditëve më parë: “Nuk ka kushte shtesë”.
“Asnjë kusht shtesë!
Ky ishte mesazhi im, të cilin e adresova edhe kur vizitova Shqipërinë si raportues për Parlamentin Evropian. Në diskutimet me presidentin e Republikës, me kryetarin e parlamentit, me kryetarët e grupeve parlamentare dhe ministrat për çështjet e Brendshme dhe Drejtësinë, si dhe me ambasadorët e shteteve anëtare të BE-së, situata e Shqipërisë ishte:
Nëse reformat në vend vazhdojnë të përmbushen ose negociatat e pranimit në BE duhet të hapen në gjysmën e parë të vitit 2018. Njerëzit në Shqipëri shpresojnë dhe e meritojnë këtë gjë. Hapja e negociatave fillon një proces shumë-vjetor të afrimit me BE-në. Kohëzgjatja e negociatave varet nga zbatimi i shumë reformave, por njerëzit do të konstatojnë: Ne në BE duam të bëjmë progres. Rrugë e vështirë. Por, ne ju ndihmojmë!”, shkruan ai përmes një statusi në Facebook.
Ndërsa vetëm pak ditë më parë, raportuesi për Shqipërinë në PE, zhvilloi një vizitë të paparalajmëruar në Tiranë. Ai së bashku me ambasadoren e BE-së, Romana Vlahutin takuan krerët e politikës dhe institucioneve shqiptare, ku midis tyre edhe presidentin Ilir Meta.
Në fokus të bisedimeve ishin avancimi i reformave me konsensus sa më të gjerë mes pozitës dhe opozitës, me qëllim integrimin e Shqipërisë në BE. Ndërsa është adresuar edhe mesazhi për zbatimin e Reformës në Drejtësi, në veçanti ecuria e procesit të Vettingut.
