Qendra Rinore Shqiptare Connecticut hap qendrën unike kulturore dhe edukative për promovimin e gjuhës dhe kulturës shqiptare.
Ceremonia e hapjes do të mbahet më 6 tetor 2017, në orën 19:00 në GR Art Gallery, shtëpinë e përkohshme të programit në adresën 1086 Long Ridge, Stamford, CT 06903.
Ndërkohë, programi i kësaj qendre do të nisë më 7 tetor 2017, në orën 09:00-14:00 me klasa të hapura për publikun dhe do të vazhdojë çdo të shtunë.
Siç është diskutuar për vite me radhë, prindërit dhe të rinjtë e komunitetit në zonat e lower Fairfield dhe Westchester do të fillojnë një program për t’i mësuar gjeneratës së ardhshme gjuhën tonë të bukur e të lashtë shqipe, pasuar nga studimet sociale/historike, vallet tradicionale dhe aktivitetet sportive.
Kështu, Qendra Rinore Shqiptare “Connecticut” ofron një mundësi për të rinjtë që të njihen me kulturën e tyre dhe të shoqërohen me të rinj të tjerë në komunitet.
Në varësi të kërkesës, pritet që klasat të jenë të nivelit fillestar, të mesëm, dhe të avancuar, ndërsa mësimi do të jepet nga mësues të certifikuar dhe artistë që kanë fituar çmime.
Qendra Rinore Shqiptare do të jetë organizata e parë në Shtetet e Bashkuara me një program të tillë të zhvilluar plotësisht. Kjo është bërë e mundur nëpërmjet ndihmës së mësuesve të dedikuar të gjuhës shqipe, Epos Dance Ensemble dhe Cedar Stars Soccer Academy në bashkëpunim me vullnetarë, organizata jofitimprurëse dhe biznese lokale.
