Hamsik: Interi dhe Roma na dhurojnë titullin kampion

Kapiteni i Napolit Marek Hamsik vazhdon të shpresojë në triumfin e Serie A. Juventusi qëndron 4 pikë më shumë se napolitanët, por gara është e hapur duke parë ndeshje e vështira që kanë përpara bardhezinjtë. Barazimi me Interin dhe disfata përballë Romës i kanë kushtuar shumë renditjes së të kaltërve të drejtuar nga Maurizio Sarri.

Golashënuesi më i mirë i të gjitha kohrave te Napoli dhe njëkohësisht kapiteni i skuadrës jugore, mendon se 4 pikë kur mbeten edhe 10 javë për t’u luajtur janë të rikuperueshme kjo edhe për faktin se Juventusi ka një kalendar më të vështirë se skuadra e Sarrit.

“Ndaj Romës gjithçka shkoi keq për ne, ndërsa ndaj Interit u ndamë në një barazim 0-0. Këto dy skuadra na kanë bërë të vuajmë, por të mos harrojmë që edhe Juventusi do të përballet ndaj këtyre dy ekipeve. Ndaj Romës dhe Interit do të vuajnë edhe bardhezinjtë, jam i sigurt për këtë. Beteja për titullin kampion vazhdon dhe ne besojmë dhe do të luftojmë deri në fund. Plus që është edhe përballja direkte mes nesh dhe Juves për t’u luajtur”, u shpreh Hamsik.