Mercedes ka dominuar provat zyrtare në pistën e Sepang, duke qenë makina më e shpejtë në përfundim të betejës për “pole position”, aty ku triumfoi piloti britanik Lewis Hamilton. Ky është pole nr.71 për pilotin e Mercedes, që do ta nisë garën e nesërme nga vija e parë e startit së bashku me shokun e skuadrës Valtteri Bottas, sot i dyti. Por Bottas do të humbasë 5 pozicione pas penalitetit të marrë për ndërrimin e kambios dhe nga kjo situatë do të përfitojë Vettel, sot i treti në provat zyrtare dhe që nesër do ta nisë garën i dyti. Gjithsesi, një paraqitje e shkëlqyer e makinës gjermane, ndjeshëm më superiore në pistë, 3 të dhjetat më e shpejtë se makinat e tjera rivale.
Në vijën e dytë të nisjes sot u klasifikuan pilotët Sebastian Vettel me Ferrari (i treti) dhe Daniel Ricciardo me Red Bull (i katërti). Makina italiane nuk ishte aq e shpejtë sa në provat e lira, duke humbur atë avantazh që kishte 24 orë më parë. I pesti u klasifikua Max Verstappen me makinën tjetër Red Bull, që la pas Kimi Raikkonen me Ferrari. Por edhe finlandezi i “kokëkuqes” ka 5 pozicione penalitet pas aksidentit në sesionin e tretë të provave të lira, ku ndërroi kambion. Në “top-10” u renditën sot edhe Ocon e Perez me Force India, Massa (Williams) e Alonso (McLaren).
Në përfundim të sesionit të parë, u eliminuan pilotët Grosejan (Haas), Gasly (Toro Rosso), Stroll (Williams) dhe dy makinat Sauber të Ericsson dhe Wehrlein, sesion ku kohën më të mirë e dha piloti britanik i Mercedes, Hamilton. Ai ishte më i shpejti edhe në përfundim të sesionit të dytë, sesion ku u eliminuan Vandoorne (McLaren), Hulkenberg (Renault), Magnussen (Haas), Palmer (Renault) dhe Sainz (Toro Rosso). Nesër, në orën 07:00 të mëngjesit do të zhvillohet gara e Japonisë, me enigmën e kushteve të motit, që janë të paqëndrueshme.
