Kroacia ka shkatërruar Argjentinën me rezultatin 3-0, një lloj hakmarrje e skualifikimit të 98-ës e cila i çon “albichelestet” në një eliminim të bujshëm nga Botërori. Argjentina me në krye Lionel Messin llogaritej ndër favoritet e Kupës së Botës, por përballë kroatëve u shndërrua në një ekip të vogël.
Lionel Messi mund ta mbyllë Botërorin në Rusi pas vetëm tre ndeshjesh dhe fajtori kryesor për këtë është portieri Wilfredo Caballero, i cili bëri një gafë që do të mbahet mend gjatë. Pas pjesës së parë, relativisht të ekuilibruar dhe të mbyllur në barazim 0-0, në minutën e tetë të pjesës së dytë erdhi gafa e 36-vjeçarit, portieri i dytë i Chelsea.
Caballero provon të pasojë për Mercado, por ishte një pasim për tu harruar që përfundoi në këmbët e Rebic i cili godet fluturimthi dhe në rrjetë. Gabim që kushtoi shumë për mënyrën si rrodhën ngjarjet më pas.
Trajneri Sampaoli hodhi menjëherë në fushë forca në sulm, ku aktivizoi Higuain dhe Dyabala, por që nuk shërbyen për asgjë. Goditjen fatale e jep një madrilen në sy të Messit, është Luka Modric që shënon një supergol nga jashtë zone dhe e dërgon në cepin e portës.
Goli i dytë në këtë Botëror që mesfushori që mban dhe shiritin e kapitenit i jep Kroacisë biletën për në raundin e ardhshëm.
Ndërkohë, në kohën shtesë Argjentina kaloi nga shiu në breshër kur Ivan Rakitic realizoi golin e tretë për kroatët. Vetëm lot për Leo Messi, pasi tani duhet t’i lutet Zotit që mos eliminohet që në fazën me grupe të “Rusi 2018”.
