Që nga koha e Ibrahimovic, Barcelona e di se sa e vështirë është për të negociuar me Mino Raiola dhe sa i shtrenjtë është menaxheri në fjalë për të arritur një marrëveshje me të. Klientët e tij janë të shumtë dhe mjaft të mirë.
Pothuajse tetë vite më vonë, pasi Zlatan u largua nga “Camp Nou” për të shkuar te Milani, Raiola dhe Barça janë gati për t’u ulur në tryezën e bisedimeve. Qëllimi është një dhe i vetëm: De Ligt.
Cilësia e qendërmbrojtësit holandez, i cili është vetëm 19 vjeç dhe kapiten i Ajax, nuk diskutohet, prandaj Raiola duhet të paguhet shumë për të. Dhe, duke pasur parasysh si shkoi situata e Ibrës te gjigantët katalanas, është momenti i duhur për hakmarrje. Diçka që Barça e kupton mjaft mirë.
Problemi ndodh menjëherë, kur agjenti i tij, duke parë interesimin e klubeve më të mira dhe më të fuqishme në Europë, zbulon pagën e synuar: 12 milionë euro për të filluar në vitin e parë. Për të gjithë këtë, ai do të duhet të dakordësohet me Ajax, nëpërmjet gojës së Marc Overmars, drejtori sportiv i klubit të njohur holandez. Ai flet për një shumë 75 milionë euro, që ta lënë të lirë talentin 19-vjeçar.
Vështirësia tani arrin kufij të pakapërcyeshëm, sepse Raiola do të kërkojë në tavolinë komisionin e tij si menaxher. Kjo është fatura e tij, jashtë marrëveshjes mes dy klubeve. Dhe agjenti i njohur vlerëson se kalimi i De Ligt në klubin katalanas vlen 10 milionë euro komision për të. Një shumë që e tremb Barçën dhe, nga pikëpamja ekonomike, e bën operacionin të paarritshëm. Por, jo vetëm për klubin katalanas.
Ekipet e tjera, që kërkojnë lojtarin, të cilin Louis van Gaal ia ka sugjeruar Barcelonës, janë Manchester City dhe PSG. Gjithashtu, ato do të duhet të kalojnë nëpërmjet përfaqësuesit të lojtarit. Dhe, duke qenë se këto dy klube janë nën hetim për shkelje të “fair play financiar”, komisioni për Mino Raiola do ta bënte operacionin më të dyshimtë. Por, palët janë duke folur. Ashtu si Bayern Munich, që ka interes të madh për De Light.
