Kryeministri Edi Rama ka mbledhur sot Task Forcën për të raportuar në Zyrën Operacionale të Situatës për operacionet kundër drogës.
Në këtë mbledhje është i pranishëm edhe Drejtori i Policisë së Shtetit, Haki Çako. Ky i fundit, gjatë fjalës së tij, theksoi se ka një ulje me 25% të sasisë së bimëve narkotike, si dhe shtoi se janë proceduar penalisht edhe punonjës të policisë, të përfshirë në trafikim.
“Vazhdon monitorimi nga ajri për të bërë të mundur identifikimin e parcelave me kanabis, policia ka rikontrolluar zonat në mënyrë masive. Procedime ka pasur dhe do të ketë edhe ndaj punonjësve të policisë dhe administratës, në rastet kur janë konstatuar shkeljet. Janë finalizuar me sukses disa operacione të zhvilluara në bashkëpunim me vendet e tjera si Italia, Mali i Zi apo Maqedonia. Gjithashtu rezulton se ka pasur një ulje me 25% e sasisë të bimëve të trafikuara dhe rritje e goditjeve ndaj grupeve kriminale”, ka thënë Çako ndër të tjera.
