Kryeinspektori i Përgjithshëm, Shkëlqim Hajdari, thekson se inspektimet online, tashmë, do të shtrihen edhe në Maqedoni.
Në takimin e zhvilluar me kryetarin e Këshillit të Inspektorateve të Maqedonisë, Vlatko Ilievski, u ra dakord që Inspektorati Qendror të japë kontributin e tij në hartimin e përmirësimin e listave të verifikimit, si dhe të ndihmojë Këshillin e Inspektorateve të Maqedonisë për futjen së shpejti të inspektimit online edhe në Republikën e Maqedonisë.
Nga ana e tij, Vlatko Ilievski theksoi sfidat e vendit të tij në fushën e inspektimeve. Sipas tij, aktualisht në Maqedoni ka 28 Inspektorate dhe status të përcaktuar për inspektimet online “e-Inspektorat”. Ai vuri në dukje se megjithëse Maqedonia ka shënuar progres në fushën e trajnimit dhe të certifikimit të inspektorëve, po punon për hartimin dhe përmirësimin e listave të verifikimit dhe dokumenteve standarde. Por, me gjithë përkufizimet në ligj, ende nuk janë ndërtuar aplikacionet dhe sistemet që bëjnë të mundur inspektimet online “e-Inspektorat”.
“Krahas punës për rritjen e efikasitetit dhe transparencës së punës së Inspektorateve Shtetërore e atyre të Qeverisjes vendore, Inspektorati Qendror ka punuar e po punon edhe për ndërtimin e urave të bashkëpunimit dhe sjelljes së përvojës e praktikave më të mira evropiane në fushën e Inspektimeve me vendet e rajonit e me gjerë. Sot në datën 19 Prill 2017, në ambientet e Inspektoratit Qendror ishin për vizitë me ftesë të Inspektorit të Përgjithshëm, z. Shkëlqim Hajdari, Kryetari dhe Presidenti i Këshillit të Inspektorateve të Republikës së Maqedonisë z. Vlatko Ilievski, bashkë me anëtarët e Këshillit z. Fitim Lloga dhe z. Qeramedin Selimi. Vizita kishte si synim ndërtimin e urave të bashkëpunimit me qëllim shkëmbimin e përvojave e praktikave më të mira në fushën e inspektimeve. Po ashtu, takimi ishte me diskutime të hapura e të frytshme midis ekspertësh për njohjen e shkëmbimin e praktikave, e të certifikimeve, të procedurave dhe të standardeve në fushën e inspektimit të ushqimeve, ilaçeve, si dhe të fushave me interes të përbashkët”, thuhet në njoftimin e Inspektoratit të Përgjithshëm.
Reforma në inspektime
Gjithashtu në takim u evidentua, se reforma në inspektime është një proces i vështirë e delikat, proces në të cilin duhen njohur e shkëmbyer përvojat e praktikat më të mira jo vetëm në nivel evropian, por edhe midis vendeve fqinje me problematika e sfida të përbashkëta. Po ashtu, realizimi me sukses i inspektimeve online nga ana e Inspektoratit Qendror, fuqizimi i kartës së inspektorit, trajnimi i vazhdueshëm e certifikimi janë, midis të tjerave, çështje me interes, ku vendi ynë ka shënuar progres.
Takimi u finalizua me nënshkrimin e Memorandumit të Mirëkuptimit e Bashkëpunimit (MiM) midis dy institucioneve homologe të dy vendeve, pika të rëndësishme të së cilës do të jenë njohje dhe shkëmbimi i certifikatave, procedurave e dokumentacioneve për inspektimet në të dyja vendet, shkëmbimi i ekspertëve dhe i përvojave më të mira, si dhe rakordimi i përpjekjeve të përbashkëta për lehtësimin e barrës së biznesit e rritjes së efikasitetit të trupave të inspektimit në të dyja vendet.
“Inspektimet online, me dokumente të standardizuara e lista verifikimi standarde e transparente, me akt administrativ të lëshuar në vendin e inspektimit janë çelësi i duhur për luftimin e korrupsionit dhe praktikave klienteliste në fushën e inspektimeve në të dyja vendet. Memorandumi i nënshkruar i mirëkuptimit do t’i shërbejë rritjes së tregtisë e shkëmbimeve midis të dyja vendeve, si dhe përmirësimit të klimës së biznesit, për ta bërë rajonin e Ballkanit Perëndimor më tërheqës ndaj investimeve të huaja. Këshilli i Inspektorateve të Republikës së Maqedonisë, duke shprehur vlerësimin për arritjet e sfidat e Inspektoratit Qendror u angazhua për projekte të përbashkëta si në nivel ndërshtetëror ashtu edhe në nivel të Komisionit Europian me qëllim përmirësimin e kuadrit ligjor e rregullator në fushën e inspektimeve, si dhe implementimin së afërmi të sistemit elektronik për inspektimet online”, përfundon njoftimi.
