Maqedonia urgjentisht do të duhet t’ju rikthehet reformave të Pribes, ndërsa skanimi i parë për suksesin e deritanishëm do të bëhet në fillim të javës së ardhshme kur në Shkup do të qëndrojnë komisari për zgjerim dhe fqinjësi, Johannes Hahn dhe Reinhard Priebe, kryesues i grupit të ekspertëve të BE-së të cilët vitin e kaluar përpiluan listën e reformave prioritare që duhet ti zbatojë Maqedonia. Hahn dhe Pribe do të takohen me të gjithë faktorët politikë në Maqedoni me të cilët do të diskutohet orientimi i vendit për tu anëtarësuar në BE dhe NATO.
Pribe do të vijë të sigurohet se janë duke u respektuar reformat në vend, sipas raportit që mban mbiemrin e tij. Ndërkaq komisari Hahn do të ndjekë nga afër edhe një seancë të hapur të Qeverisë. Qeveria është zotuar se do të intensifikojë aktivitetet për zbatimin e reformave në 6 muajt e ardhshëm me qëllim që këtë vit të fitohet rekomandimi pa kushte për fillimin e negociatave me BE-në.
Vitet e kaluara Komisioni Evropian, disa herë i ka tërhequr vërejtjen Maqedonisë se ka shënuar regres dhe ka humbur shumë kohë në procesin reformues dhe integrues, andaj një grup ekspertësh të udhëhequr nga Rinhard Pribe përpiloi një listë reformash dhe obligimesh që vendi duhet ti mbushe urgjentisht.
Fusha e parë, sensitive të cilën e përcaktoi Raporti është “Ndjekja e komunikimeve” dhe ka të bëjë me bisedat e përgjuara. Rekomandimet të cilat i jep ky Raport, përfshijnë: mandati i Drejtorisë për Siguri dhe Kundërzbulim të zvogëlohet në mënyrë përkatëse dhe DSK të mos ketë qasje të drejtpërdrejtë te pajisja teknike për përgjim, raporton Shenja.
Për fushën e dytë “Gjyqësori dhe prokuroria” në raportin e Pribes rekomandohet përforcimi i komunikimit ndërmjet institucioneve gjyqësore si dhe zvogëlimi i masës paraburgim gjatë procedurës hetimore. “Mbikëqyrja e jashtme nga trupa të pavarur” respektivisht Avokati i Popullit dhe Drejtoria për Mbrojtjen e të Dhënave Personale është fusha e tretë e Raportit. Fusha e katërt janë zgjedhjet dhe në mesin rekomandimeve të tjera janë edhe zbulimi i pa rregullsive të cikleve zgjedhore paraprake dhe këto manipulime zgjedhore të procedohen në mënyrë gjyqësore. Fusha e fundit është liria e mediave, një nga fushat e vlerësuara si më të cenuara në Maqedoni, ndërsa gjendja në mediat thuhet se vazhdimisht përkeqësohet. Këto fusha përmbajnë edhe një listë të gjatë konkrete të obligimeve, ndryshimeve ligjore dhe reformave të tjera të cilat duhet të implementohen si kusht për procesin integrues të vendit.
