Kryeministri i Maqedonisë, Zoran Zaev ka habitur sot me deklaratën e tij, teksa doli në një konferencë së bashku me ministrin e Financave, Dragan Tevdovski.
I pyetur nga gazetarët për çështjen e arratisjes së Gruevskit, Zaev tha se ish-kryeministri që ka kërkuar azil në Hungari, duhet të tregojë nëse ka ikur nga Maqedonia më vullnet të plotë, apo është rrëmbyer.
“Ne do të bëjmë gjithçka që Nikolla Gruevski të vuajë dënimin këtu në Maqedoni. Dhe publikisht po parashtroj pyetjen, duke e ditur se si kanë ndodhur gjërat, a e ka lëshuar vullnetarisht zoti Gruevski Maqedoninë, para se gjykata ta ketë lëshuar urdhrin për arrestimin e tij, apo edhe mund të jetë rrëmbyer? Pres përgjigje edhe nga Gruevski, edhe nga Hungaria. Është e udhës që si shtet t’i bëjmë këto pyetje”, tha Zaev.
Ky i fundit i arsyetoi dyshimet së mund të jetë rrëmbyer, duke iu referuar arratisjes me veturën diplomatike të ambasadës hungareze.
Zaev shtoi se në lidhje me këtë rast ka bashkëpunim të mirë edhe me autoritetet shqiptare edhe malezeze.
