Vetëm 2 ditë para zhvillimit të zgjedhjeve për kreun e PD-së, kandidati Eduard Selami ka habitur me deklaratën e tij.
Teksa ishte i ftuar në emisionin “Top Story”, Selami deklaroi se Lulzim Basha e ka përdorur çadrën dhe bojkotin e Parlamentit për bllokimin e reformës në drejtësi, gjë që sipas tij, vuri partnerët ndërkombëtarë kundër Partisë Demokratike.
“Basha na vendosi edhe kundër perëndimorëve. Ka thënë për marrëveshjen që më nxorën në pritë amerikanët dhe gjermanët, kjo nuk është kështu. Basha e përdori çadrën për të bllokuar reformën në drejtësi. Ajo kauza e çadrës nuk ishte e sinqertë. Hyri në çadër, kështu edhe ashtu dhe sesi doli nuk e morëm vesh. Madje nuk ka as një kontratë të firmosur me zotin Rama”, tha ai.
Gjithashtu, Selami bëri një tjetër deklaratë të fortë pasi tha se është Berisha ia që nuk ka lejuar dorëheqjen e Lulzim Bashës:
“Personi që e mbajti zotin Basha kryetar ishte Berisha, ndryshe Basha do të dorëhiqej si kryetar. Modeli i zotit Basha nuk është modeli i zotit Basha, është një hije e zotit Berisha, që nuk mund të përsëritet dhe fakti që në dy zgjedhjet e fundit, Basha ka bërë humbjet më të mëdha të pd mjafton që ai nuk duhet të jetë më në PD.
Edhe Patozi dhe këta të tjerët që janë kundër garës nuk kanë asgjë me mua. Nuk kanë asgjë me modelin tim, madje e mbështesin dhe vetëm më thonë se nuk fiton dot garën”, tha Selami ndërsa ripërsëriti mos-mbajtjen e premtimit nga ana e Bashës për të zhvilluar debate në garën për kreun e PD-së.
“E lamë që do të bënim debate dhe menduam edhe për moderatorin madje. Këtë premtim nuk e mbajti, madje nuk la as mediat të hynin. Zoti Basha e refuzoi debatin, por ne edhe me dyer të mbyllura kemi bërë debate dhe kanë qenë goxha të ashpra si në Shkodër”, u shpreh Selami.
