Guvernatori i Bankës së Shqipërisë, Gent Sejko, iu kërkoi bankave të nivelit të dytë të dalin nga situata stanjante dhe të rrisin kreditimin për ekonominë. Sejko e bëri deklaratën në takimin përmbyllës së Shoqatës së Bankave, ku deklaroi se sektori mbetet i qëndrueshëm.
“Viti që po mbyllet, konfirmoi qëndrueshmërinë e sektorit bankar shqiptar. Ai mund të vlerësohet i veçantë për vetë faktin që sistemi përjetoi ndryshime strukturore të rëndësishme, të cilat priten të finalizohen në vitin që po hyjmë. Veprimtaria e sektorit vijoi të zgjerohej, duke mbetur e mirëkapitalizuar, likuide dhe me fitim. Megjithatë, përtej kësaj, vlerësoj se niveli i përgjithshëm i kreditimit të ekonomisë është ende larg potencialit dhe mundësitë për të zgjeruar kredidhënien janë të shumta. Mirëkuptoj deri diku faktin që në këtë fenomen ndërthuren probleme si nga ana e kërkesës së dobët, ashtu edhe nga një ofertë e kushtëzuar nga standardet e shtrënguara të kreditimit. Megjithatë, përtej faktorëve strukturorë, vlerësoj se duhet të reagojmë për të shmangur gjendjen stanjante në kreditimin e ekonomisë”, u shpreh Sejko.
Sejko kërkoi që bankat të propozojnë masa konkrete për gjallërimin e ekonomisë. “Ritmi i rritjes ekonomike e ka të nevojshme gjetjen e mbështetjes në dinamikën e kreditimit bankar. Synim konstant mbetet nevoja për ta eksploruar tregun në vazhdimësi, për të identifikuar klientët potencialë, veçanërisht familjet dhe bizneset e vogla dhe më kryesorja për t’i ndihmuar ata në ndërtimin e një projekti të vlefshëm për financim. Kjo kërkon të konceptoni dhe ndërtoni strukturat, proceset dhe produktet e nevojshme, si edhe të planifikoni burimet e duhura financiare”, u shpreh Sejko.
Guvernatori i Bankës së Shqipërisë, Gent Sejko, vlerësoi se ritmet e rritjes së ekonomisë vijojnë të jenë pozitive mbështetur nga eksportet, investimet dhe konsumi. “Ecuria e përgjithshme e ekonomisë shqiptare, gjatë vitit 2018, duhet vlerësuar si pozitive. Rimëkëmbja ekonomike është e prekshme në gjithë dimensionet e saj. Ritmi i rritjes është përshpejtuar, punësimi është rritur, ekuilibrat e brendshëm dhe të jashtëm të vendit janë forcuar, ndërkohë që treguesit kryesorë të shëndetit të sektorit bankar paraqiten në përmirësim. Inkurajues është fakti se burimet e rritjes ekonomike janë në rritje dhe të mirëdiversifikuara. Nga ana e kërkesës agregate, rritja ekonomike u mbështet nga rritja e eksporteve të mallrave e shërbimeve, si dhe nga rritja e konsumit dhe e investimeve të brendshme. Perspektiva e zhvillimit të vendit mbetet pozitive. Kjo do të thotë se Shqipëria ofron premisa solide biznesi dhe rritjeje për sektorin bankar. Megjithatë, rritja dhe zhvillimi nuk vijnë vetiu. Përkundrazi, ato pasqyrojnë përkushtimin, mundin dhe dedikimin e të gjithëve”, tha Sejko.
