Guvernatori i Bankës së Shqipërisë, Gent Sejko ka folur mbi domosdoshmërinë e vazhdimit të reformave strukturore, pas fitimit të zgjedhjeve nga Partia Socialiste.
I ftuar në emisionin “Argument” në Televizionin SCAN, Sejko e konsideroi rezultatin e zgjedhjeve një siguri për vazhdimin e reformave, që sipas tij kanë ndikuar në rritjen ekonomike.
“Ne normalisht kemi ndjekur një plan reformash me kryeministrin Rama, të cilin përfitoj nga rasti ta uroj për fitoren edhe në emisionin tuaj. Janë ndjekur një sërë reformash, sigurisht që rritja ekonomike që ne kemi pasur nuk ka rënë nga qielli, por është si pasojë e këtyre reformave, është pasojë e faktorëve të jashtëm dhe kryesisht pasojë e reformave të ndërmarra. Rezultati i fundit zgjedhor është një siguri më tej për vazhdimin e këtyre reformave. Këto reforma do të duhet të vazhdojnë. Shpesh herë Banka e Shqipërisë, Këshilli Mbikëqyrës i Bankës së Shqipërisë dhe unë në emër të Këshillit Mbikëqyrës kemi bërë thirrje për vazhdimin e reformave strukturore. Reformat strukturore përbëjnë një gamë të gjerë aktorësh. Qeveria ka një rol kryesor, por të gjithë faktorët e tjerë, sistemi ligjor, sistemi financiar, qeveria dhe parlamenti kanë rol në performancën e reformave strukturore.
Unë angazhohem në emër të Bankës Qendrore që do të vazhdojmë me reformat tona në drejtim të stabilitetit të çmimeve, rritjes së nivelit të inflacionit prej 3 për qind në afatin e duhur, por edhe të ruajtjes së nivelit të stabilitetit financiar. Harmonizimi i politikave, i strategjive tona si Bankë Qendrore, bashkë me politikat dhe strategjitë e qeverisë shqiptare do të sjellim një performancë më të mirë dhe do të ketë një ndikim më të madh në nivelin e rritjes ekonomike, si dhe në nivelin e rritjes së mirëqenies së qytetarëve shqiptarë”, tha Sejko.
