Guroret po shkatërrojnë mjedisin, e si pasojë shumë banorë ankohen për kushtet e vështira të jetesës si pasojë e tyre. Lidhur me këtë, ministri i Mjedisit Blendi Klosi është shprehur se gjithçka do të ndryshojë.
“Biznesi i gurores është një biznes që do të funksionojë, por do të përcaktojmë funksionimet e tyre. Kam një shembull të një guroreje klasike dhe asaj të TAP. Gurorja e parë që është e shqiptarëve e ndot dhe e qelb vendin, ndërsa ajo e TAP ka shumë cilësi dhe që e mban mjedisin të pastër”, tha Klosi për “News24”.
Ministri i Mjedisit shtoi se do të përcaktohen rregullat dhe kriteret evropiane për një gurore klasike, ku sipas tij, ato që nuk u qëndrojnë standardeve do të mbyllen.
“Duhet të ketë disa kritere për hapjen e gurorëve. Në qoftë se sistemi i guroreve është më i mirë, pa dyshim që do të ketë më shumë punë, pagë më të mirë, por nuk do të lejojmë që të prishim mjedisin. Nga mali më i largët i veriut deri në jug kemi 1000 gurore, por tani nuk do jetë më kështu. Edhe lejet mjedisore do të jenë ndryshe. Nuk do të ketë leje mjedisore që të hapet një gurore në një vend me hapësirë të vogël, ku bën një gropë dhe nuk fiton asgjë. Një gurore të funksionojë, por të mbrojë ambientin dhe njerëzit. Papastërtia është shumë shqetësuese”, tha Klosi.
