Në një intervistë të dhënë për “Gazzetta dello Sport”, Fredy Guarin ka tregua prapaskenat e tij gjatë kohës që ishte pjesë e Interi, tratativën me Juventusin dhe largimin e tij drejt Kinës. Kolumbiani është shprehur se ai dëshiron të kthehet sërish tek Interi duke e quajtur atë si shtëpinë e tij dhe këtë thirrje e ka bërë publike, duke pranuar edhe një reduktim të rrogës së tij aktuale(10 milionë euro), vetëm për tu veshur sërish zikaltër.
“Inter është familja ime, më ktheni në shtëpi. Paratë nuk janë një problem. Do të pranoja edhe një të pestën e rrogës aktuale (fiton 10 milionë euro). Vitin e kaluar kam folur me Ausilio-n, por nuk ka qenë e mundur për shkak të kushteve ekonomike”, ka thënë kolumbiani, i cili është transferuar në Kinë, te Shanghai Shenhua, dy vite më parë. “Kush do ta fitojë titullin? Juventus mbetet favorite, ka skuadrën më të mirë, por Napoli më pëlqen shumë. Më kërkuan në verën e 2014-ës, por është pjesë e së kaluarës”.
Më pas Guarin tregon se nuk ishte dëshira e tij për tu bashkuar me Juventusin në atë periudhë, por falënderoi tifozët që u ngritën dhe kundërshtuan e më pas dështoi gjithcka.
“Tratativa me Juventusin? Eh çfarë tratative. Ishte dëshira dhe ideja e Mazzarrit. Donte të merrte Vucinic e për ta marrë atë, duhet të shkoja unë atje. Juventusi më donte që kur mbërrita në Itali, por unë e kisha bërë zgjedhjen time. Gjatë atij janari kishte tifozë që edhe më quajtën tradhtar, por nuk kisha asnjë faj, kur trajneri nuk të do më, çfarë mund të bëjë një lojtar? Por në atë moment ndërhyri edhe Moratti që bllokoi gjithçka me Zanettin dhe Cordoben. Nuk mund të harroj as tifozët e Interit dhe protestën e tyre për këtë transferim sepse ishin ata që ndaluan në një farë mënyre gjithçka. Largimi erdhi fiks dy vite më vonë? Po, për shkak te Fair Play Financiar. Drejtuesit ishin të qartë, erdhën tek unë dhe më thanë: “Vetëm ti dhe Icardi jeni të vetmit që mund të shiten për një vlerë të caktuar, kemi nevojë për para”. Natyrisht që askush nuk më detyroi, por shitja ime ishte shumë e rëndësishme për klubin që unë dashuroja. Ishte e vetmja gjë pozitive e largimit tim”, përfundon Guarin.
