Pronari i restorantit “Koha” në Prizren, Burim Sallauka ka sulmuar fizikisht njërin prej punëtorëve të tij në ambientet e restorantit para disa muajsh.
Insajderi ka siguruar videon e sulmit fizik, në të cilën shihet biznesmeni Sallauka (i veshur me bluzë ngjyrë gri) teksa thërret pranë tij punëtorin e tij, kamarier i restorantit, dhe e godet me grushte. Sulmin fizik ndaj kamarierit të restorantit që ai menaxhon, Sallauka e vazhdon edhe në një hapësirë tjetër të restorantit, të pa incizuar nga kamerat.
I kontaktuar nga Insajderi, Sallauka ka mohuar ta ketë kryer sulmin, ndonëse në video shihet ai teksa grushton punëtorin e biznesit të tij.
“Nuk kam sulmuar askënd. Nuk e di se as për çfarë sulmi je duke fol”, ka thënë fillimisht Sallauka. “Për çfarë video bëhet fjalë?”, ka pyetur ai.
“Nuk është e vërtetë, unë prej një jave jam në Prevallë. Nuk ka asgjë [të vërtetë]”, ka thënë Sallauka. “Nuk është e vërtetë… ju mos më publikoni. Emrin tim mos e nxirrni, nuk është e vërtetë ajo”. /Insajderi.com
