Gruevski mund t’i kalojë 20 vitet e ardhshme në burg

Nëse ish-kryeministri do të dënohet edhe për katër akuzat e tjera të ngritura nga Prokuroria Speciale, ai mund të dënohet me dënimin maksimal deri në 20 vjet burg, duke mos llogaritur dënimin e parë prej 2 vjet që dje iu shqiptua nga Gjykata Penale për rastin “Tanku” për blerjen e Mercedesit 600 mijë euro,shkruan Makfax.
Sipas Kodit penal, dënimet do të variojnë varësisht nga veprat penale, por më se shumti i kanoset burg në tri veprat në rastin “Titanik”. Për bashkëveprim në krim të kryer, Gruevski si i akuzuari i parë në këtë rast kanoset me 5 vjet burg. Gjatë ditëve në vijim, Gruevski sërish do të paraqitet në seancë gjyqësore për katër akuzat e tjera.