Ashtu siç kishte paralajmëruar, Nikolla Gruevski ka dhënë dorëheqjen nga drejtimi i partisë VMRO DPMNE, e cila ka qeverisur Maqedoninë deri para qershorit të këtij viti kur drejtimin e vendit e mori Lidhja Social Demokrate e kryeministrit aktual, Zoran Zaev.
Ky vendim i Gruevskit erdhi pas rezultatit të dobët të partisë në zgjedhjet lokale të muajit tetor, pasi nga 80 komuna, partia e tij arriti të marrë vetëm pesë prej tyre duke shënuar rezultatin më të dobët që nga vendosja e pluralizmit.
Kështu, ai i paraqiti dorëheqjen e parevokueshme Komitetit Drejtues të partisë, duke u dorëhequr nga drejtimi i VMRO DPMNE-së, parti të cilën e drejtonte që në vitin 2003.
Kryetar i ri partisë më të madhe të opozitës do të zgjidhet në kongresin e jashtëzakonshme pas dy javësh.
Por, cilët janë emrat e mundshëm që pritet të zëvendësojnë Gruevskin?
Për kreun e ri të partisë përmenden disa kandidatura të mundshme, si deputetët Ilija Dimovski dhe Antonio Mislloshoski, ish-ministri i Punëve të Jashtme, Nikolla Poposki, ish-ministri i Shëndetësisë, Nikolla Dimitrov, Hristijan Mickovski, por edhe emri i ish-kryetarit të partisë, Lubço Georgievski.
Largimi i Gruevskit nga partia ndodhë në momentin kur ai dhe shumë personalitete tjera të saj po përballen me procese gjyqësore për vepra të rënda penale.
Ndaj Gruevskit po zhvillohen së paku katër procese për mashtrime zgjedhore, kurdisje tenderësh, porositje të dhunës ndaj zyrtarëve të LSDM-së e vepra tjera.
