E veja e politikanit të vrarë serb, Oliver Ivanoviç ka folur së fundmi për mediat, ku deklaroi se vrasja e të shoqit ka filluar të keqpërdoret dhe politizohet.
Madje, ajo ka paralajmëruar se së shpejti do të publikohet një provë e re, që është një video e ngjarjes që do të qartësojë shumë detaje.
Milena Ivanoviç foli për RTS, teksa tha:
“Po i dëgjoj organet kompetente të Prishtinës, po i dëgjoj dhe tanët. Po shpresoj se e vërteta do të dalë në shesh, nëse jo këtë vit, ndonjë vit tjetër. Për mua është më e rëndësishme të dalë e vërteta. Besoj shumë në hetuesinë tonë, por pres të shoh çfarë do të ndodhë. Mendoj që e vërteta nuk mund të fshihet më, kur të dalë videoja.”, shtoi e veja e Oliver Ivanoviç, teksa vazhdoi:
“Ka pasur shumë të arrestuar gjoja për vrasjen e Oliverit, tani ka pesë emra të rinj. Mendoj se për fat të keq do të vazhdojë në vitin 2019, se do të përdoret dhe keqpërdoret kjo tragjedi sa duhet, do të shfaqen disa emra të rinj. Mendoj se kjo nuk është e drejtë. Kushdo që qëndron prapa këtyre tregimeve duhet të ndalojë dhe mendoj se duhet të bashkohemi së bashku Beogradi, Prishtina dhe të huajt, të cilët unë mendoj se janë shumë të rëndësishme, të zbulojmë të vërtetën dhe të dimë se kush ka shtënë në Oliverin, mendoj se kjo është e rëndësishme për ne”.
